АКШ президенти Дональд Трамп 24-апрелде АКШ менен Ирандын ортосундагы сүйлөшүүлөрдүн экинчи айлампасына байланыштуу оң жаңылыктар болушу мүмкүн экенин билдирди.
«The New York Post» басылмасынын Исламабаддагы булактарынын маалыматына караганда, Пакистандын ортомчулук аракеттери белгилүү бир жыйынтык берген. Ошондой эле Пакистан тарап жакынкы 36–72 саат ичинде АКШ менен жаңы байланыштар күтүлүп жатканын билдирген. Басылма бул маалымат боюнча Трамптан комментарий сураган.
«Бул мүмкүн», — деп жооп берген АКШ лидери.
Белгилей кетсек, АКШ менен Иран өкүлдөрүнүн алгачкы жолугушуусу 11-апрелде Пакистандын борбору Исламабад шаарында өткөн. Анда тараптар Ирандын өзөктүк программасы жана Ормуз кысыгы аркылуу деңиз каттамы маселелеринде бир пикирге келе алышкан эмес.
Учурда Иран Ормуз кысыгын көзөмөлдөп турса, АКШ Ирандын айрым портторуна чектөө киргизген.
