Президент Садыр Жапаров мыйзамга ылайык, анын ыйгарым укуктары жаңы шайланган президент ант бергенге чейин улана турганын билдирди. Бул тууралуу ал Super.kg порталына берген маегинде айтты.
Мамлекет башчы 2021-жылы президенттин милдетин аткаруучу кызматын тапшырып, шайлоого катышканы менен азыркы жагдайдын айырмасы бар экенин белгиледи. Анын айтымында, ал кезде премьер-министр жана президенттин милдетин убактылуу аткаруучу болгондуктан, Конституциянын талабына ылайык, шайлоого катышуу үчүн премьер-министрлик ыйгарым укуктарын тапшырган. Ал эми азыр эл тарабынан шайланган президент катары иштеп жатат.
Жапаров учурда эл менен өткөрүп жаткан жолугушууларын үгүт иштери катары кароого болбой турганын айтты. Анын белгилешинче, ал жыл башынан бери аймактарды кыдырып, тургундардын көйгөйлөрүн угуп, мамлекеттик органдардын ишин көзөмөлдөп келет. Президент бул иштер анын түздөн-түз милдетине кирерин кошумчалады.
Ошондой эле мамлекет башчы шайлоого катышкан бардык талапкерлерге бирдей шарт түзүлөрүн айтып, мамлекеттик кызматкерлерди кимдир бирөөгө добуш берүүгө мажбурлоо боюнча тапшырма берилбегенин билдирди.
Жапаров шайлоо системасы толук автоматташтырылып, электрондоштурулганын белгиледи. Анын айтымында, шайлоочу келгенде бюллетень ошол жерден чыгарылып, бул механизм добуш берүүнүн ачыктыгын камсыз кылууга жана мыйзам бузуулардын алдын алууга багытталган.
Президент алдыдагы шайлоодо административдик ресурс колдонулбай турганын баса белгилеп, эң башкысы добуш берүү таза, ачык жана мыйзам чегинде өтүшү керектигин айтты. Ал ар бир жаран өз тандоосун эркин жасашы керектигин кошумчалады.
Булак: Super.kg
