Жогорку Кеңештин депутаты Таалайбек Сарыбашов мектептердин айланасында сатылган арзан таттуулар балдардын ден соолугуна зыян келтирип жатканын айтып, аларды сатууга тыюу салууну сунуштады. Бул тууралуу ал парламенттин жыйынында билдирди.
Депутаттын айтымында, баасы 10–15 сом болгон сагыз, чупа-чупс жана балмуздак сыяктуу азыктардын сапаты күмөн жаратып, балдардын тиштерине жана жалпы ден соолугуна терс таасирин тийгизүүдө.
«Балдар биздин келечегибиз дейбиз. Алардын ден соолугуна азыртан кам көрбөсөк, келечекте улуттук саламаттыкка олуттуу доо кетет», — деди ал.
Мындан тышкары, Сарыбашов балдарды кичине кезинен тартып туура тамактанууга үйрөтүү зарылдыгын белгиледи. Ошондой эле алыскы аймактардагы мектептерде жана бала бакчаларда берилген тамак-аштын сапатын тыкыр көзөмөлгө алууну сунуштады.
