Өлкө башчы Садыр Жапаров кыргызстандыктарды Нооруз майрамы менен Нарын шаарынан куттуктап жатып, Теңир-Тоо жергесинен чыккан атактуу инсандарга токтолду.
Ал өз сөзүндө каада-салтын сактап келген элдин арасынан чыккан улуу инсандарды атап өтпөй кетүү туура эмес экенин белгиледи. Президент Теңир-Тоо аймагынан чыккан тарыхый жана маданий фигураларды эскерип, алардын кыргыз эли үчүн орду чоң экенин айтты.
Алардын катарында олуязаада Кошой, манасчылар Сагымбай Орозбаков, Тыныбек Жапый уулу, Шапак Рысмендеев, ошондой эле баатырлар Тайлак баатыр, Ормон хан жана башка көптөгөн тарыхый инсандар бар экенин айтты.
Мындан тышкары, мамлекет түптөгөн жана коомго зор салым кошкон Ишеналы Арабаев, Турдакун Усубалиев сыяктуу мамлекеттик ишмерлер да аталган.
Президент ошондой эле маданият, илим жана адабият тармагындагы ири инсандарды да эскерип, Теңир-Тоо аймагын «рухий тоолордун» мекени катары мүнөздөдү.
