.
Кыргыз Республикасынын Улуттук банкы жоопкерчиликтүү башкарууга, ачык-айкындуулукка жана корпоративдик тажрыйбалардын жоопкерчилигине таянгандыгын тастыктоо менен, ESG принциптерин өз ишине киргизүүдө. Бириккен Улуттар Уюмунун Өнүктүрүү программасы (БУУӨП) менен биргеликте Кыргыз Республикасынын Улуттук банкынын саясатына жана ишине ESG принциптерин интеграциялоо боюнча жол картасы иштелип чыкты. Документ Улуттук банк Башкармасы тарабынан 2025-жылдын 26-декабрында бекитилген. Улуттук банктын кызматкерлери үчүн 2026-жылдын 20-январынан 23-январына чейин жол картасын ишке ашыруунун алкагында «Улуттук банктын саясатына жана ишине ESG принциптерин интеграциялоо боюнча жол картасын ишке ашыруу» темасында билим берүү тренинги өткөрүлдү. Окутуу БУУӨП консультантынын колдоосу менен уюштурулду. Иш-чарага Улуттук банк Башкармасынын мүчөсү Ж.С. Сулайманбекова, ошондой эле Кыргыз Республикасынын Улуттук банкынын борбордук аппаратынын жана облустук башкармалыктарынын кызматкерлери катышты. Тренингдин жүрүшүндө катышуучулар ESG ыкмаларынын негизги принциптери, эл аралык тажрыйба, ошондой эле жол картасын ырааттуу жана натыйжалуу ишке киргизүү үчүн зарыл болгон негизги этаптар жана инструменттер менен таанышты. Кыргыз Республикасынын Улуттук банкы ESG принциптеринин ишке киргизилишин өз ишине туруктуулукту, натыйжалуулукту жана ишенимди бекемдөөгө багытталган маанилүү кадам катары карайт. ESG ыкмаларынын алкагында коомго жоопкерчиликтүү мамиле жасоо, социалдык жоопкерчиликти бекемдөө, ошондой эле ресурстарды күндөлүк иште жоопкерчиликтүү керектөө жана сарамжалдуу пайдалануу маданиятын калыптандыруу маселелерине өзгөчө көңүл бурулат.
