Бишкек мэриясы муниципалдык көрүстөндөрдө мурда каза болгон жубайынын жанынан орунду алдын ала брондоо боюнча түшүндүрмө берди.
Маалыматка ылайык, шаардык кеңештин кароосуна көмүү жайларын брондоо үчүн кошумча кызмат көрсөтүүлөрдүн коэффициентин бекитүү тууралуу токтом долбоору киргизилген.
Кыргызстандын мыйзамдарына ылайык, мурда каза болгон жубайынын (аялынын же күйөөсүнүн) жанынан орунду алдын ала брондоо укугу никелик мамилелерди ырастаган документтери бар жубайына берилет.
Учурда республикалык маанидеги шаарларда көмүү үчүн жерди брондоонун негизги баасы 1000 эсептик көрсөткүчтү түзөт. Мындан тышкары, кошумча кызмат көрсөтүүлөр үчүн төлөм алынат.
Бишкек шаардык кеңешине сунушталган долбоордо бул коэффициентти 50 миң 647 сом өлчөмүндө бекитүү каралган. Натыйжада муниципалдык көрүстөндө бир орунду алдын ала брондоонун жалпы баасы 150 миң 647 сомду түзөт.
Мэриянын маалыматына караганда, бул сумма жер тилкесин даярдоо жана берүү, аймакты көрктөндүрүү, санитардык тейлөө жана 10 жыл бою күтүү чыгымдарын камтыйт. Орун дал ушул мөөнөткө брондолуп, аны кароо боюнча милдеттенмени муниципалдык ишкана өзүнө алат.
Белгиленгендей, көмүү үчүн орунду алдын ала брондоо ыктыярдуу негизде жүргүзүлөт жана бул мүмкүнчүлүк мурда жерге берилген жубайынын жанынан орун сактап коюуну каалаган жарандар үчүн гана каралган.
Ал эми башка жарандар үчүн сөөк коюу тартиби өзгөрүүсүз калып, учурдагы мыйзамдардын негизинде жүргүзүлө берет.
