V Бишкек эл аралык кинофестивалынын алкагында 8–11-июнь күндөрү Бишкек шаарында ачык асман алдында акысыз кино көрсөтүүлөр уюштурулат.
Иш-чара борбор калаадагы Т. Усубалиев атындагы аянт (Эски аянт) аймагында өтүп, шаар тургундары менен конокторуна дүйнөлүк кино өнөрүнүн мыкты үлгүлөрүн көрүү мүмкүнчүлүгүн түзөт.
Фестивалдын жүрүшүндө аянт заманбап ачык кинотеатрга айланып, көрүүчүлөр ар түрдүү өлкөлөрдүн жана маданияттардын тасмалары менен тааныша алышат. Уюштуруучулардын айтымында, бул демилге кино искусствосун кеңири аудиторияга жеткирүүгө жана маданий эс алууну өнүктүрүүгө багытталган.
Кино көрсөтүүлөргө бардык каалоочулар катыша алышат. Кирүү акысыз.
Иш-чара 8-июндан 11-июнга чейин күн сайын өткөрүлөт.
