.
Ош шаарынын күнүнө жана Кыргызстандын Баатыры, залкар жазуучу Төлөгөн Касымбековдун 95 жылдыгына карата төкмө акындардын республикалык айтышы уюштурулат.
Маданият, маалымат жана жаштар саясаты министрлигинин маалыматына ылайык, тандоо туру 1-октябрда саат 10:00дө Кыргыз улуттук «Манас» театрында өтөт. Ал эми өлкөнүн түштүк аймагындагы акындар үчүн тандоо туру 3-октябрда Ош шаарында өткөрүлөт.
Тандоонун жыйынтыгында жогорку упай топтогон 12 акын финалга чыгат. Финалдык айтыш 3-октябрда саат 17:00дө Бабур атындагы Ош мамлекеттик музыкалык драма театрында өтмөкчү.
Калыстар акындардын чеберчилигин, сөз байлыгын, теманы ачып берүү жөндөмүн, үнүн, комуз чертүү деңгээлин жана сахна маданиятын баалашат.
Айтыштын жалпы байге фонду 1 миллион сомду түзөт.
Иш-чараны Ош шаарынын мэриясы, Маданият, маалымат жана жаштар саясаты министрлиги, Кыргыз улуттук «Манас» театры жана «Айтыш» коомдук фонду биргеликте уюштурууда.
