.
Жалал-Абад облусунун Чаткал районунда 15 жаштагы 9-класстын окуучусунун өлүмүнө шектелген төрт 17 жаштагы өспүрүм 19-ноябрга чейин камакка алынды.
Ала-Бука райондук сотунун тергөө судьясы мындай чечимди 19-сентябрда чыгарганын Жалал-Абад облустук сотунун басма сөз кызматы билдирди.
Маалыматка караганда, окуя 18-сентябрда болгон. 15 жаштагы өспүрүм Жаңы-Базар аймактык ооруканасына жетпей каза болгон.
Бул факты боюнча Кылмыш-жаза кодексинин 130-беренеси («Ден соолукка оор залал келтирүү») менен кылмыш иши козголгон. Тергөө учурунда кылмышка шектүү катары 17 жаштагы төрт өспүрүм кармалган.
Каза болгон окуучу 9-класста, ал эми шектүүлөр 11-класста окуганы айтылды.
Белгилей кетсек, 17-сентябрда Сузак районунда да 11-класстын окуучусу ур-токмоктон каза болгон. Бул иш боюнча эки өспүрүм кармалып, 17-ноябрга чейин камакка алынган.
