Бириккен Араб Эмираттары 15 жашка чейинки балдардын санариптик платформаларды пайдалануусун чектеген жаңы мыйзам кабыл алды. Бул тууралуу Интерфакс агенттиги билдирди.
Жаңы талаптар Instagram, TikTok сыяктуу социалдык тармактарга гана эмес, Netflix, YouTube, Spotify жана аккаунт аркылуу иштеген башка видео, музыка жана оюн платформаларына да тиешелүү болот.
Мыйзамга ылайык, 15 жашка чыга элек балдар мындай платформаларды ата-энесинин көзөмөлүндө же үй-бүлөлүк аккаунт аркылуу да колдоно алышпайт.
Ал эми 15–16 жаштагы өспүрүмдөр үчүн айрым функцияларга чектөө киргизилет. Тактап айтканда, платформалар түз эфир өткөрүү мүмкүнчүлүгүн, жалпы чаттарды жана көз карандылыкты күчөтүшү мүмкүн болгон алгоритмдик сунуштарды өчүрүүгө милдеттүү.
Мындан тышкары, кызмат көрсөтүүчү компаниялар колдонуучулардын жашын документтер, биометрикалык маалымат же жасалма интеллект аркылуу текшерүүгө тийиш. Бул талаптарды ишке ашыруу үчүн платформаларга 12 айлык мөөнөт берилди.
Жаңы эрежелерди аткарбаган платформаларга айып пул салынып, зарыл болгон учурда алардын ишмердүүлүгү өлкө аймагында толугу менен токтотулушу мүмкүн. Ошондой эле баланын жашы тууралуу атайылап жалган маалымат берген ата-энелерге административдик жоопкерчилик каралган.
