Кыргызстандагы өрт өчүрүүчү техникалар 22-кабаттан жогору жайгашкан батирлерде чыккан өрттү өчүрүүгө мүмкүнчүлүгү жетпейт. Бул тууралуу өзгөчө кырдаалдар министри Канатбек Чыныбаев "Ачык кабинет" долбоорунун алкагында билдирди.
Анын айтымында, дүйнөлүк практикада өрт өчүрүүчү тепкичтердин эң узуну 70 метрге чейин жетет. Азыркы тапта ӨКМдин карамагында мындай төрт гана атайын техника бар. Алардын экөө Бишкекте, дагы экөө Ош шаарында жайгашкан.
"Бул техникалардын тепкичтери эң көп дегенде 22-кабатка чейин көтөрүлөт. Андан жогору кабаттарда чыккан өрттү сырттан туруп өчүрүү мүмкүн эмес", — деди министр.
Чыныбаев белгилегендей, өлкөдө 40 кабатка чейинки турак жайларды куруу пландалып жаткандыктан, мындай имараттар өрт коопсуздугунун заманбап талаптарына жооп бериши зарыл. Атап айтканда, көп кабаттуу үйлөрдө сууну жогорку кабаттарга жеткирүүчү ички түтүк системалары, атайын эвакуациялык тепкичтер жана башка коопсуздук каражаттары сөзсүз болушу керек.
Министрдин айтымында, бул талаптар курулуш компаниялары үчүн милдеттүү шарт катары каралышы зарыл.
Ошондой эле ал ӨКМ баасы болжол менен 1 миллион долларды түзгөн, бийиктиги 60 метрге чейин жеткен жаңы өрт өчүрүүчү техниканы сатып алууга буйрутма бергенин маалымдады.
