Ала-Тоо аянтындагы балдарга уяттуу сөздөрү бар музыка койгон диджей кыз менен мэр жолукту
Бишкек шаарынын мэри Айбек Джунушалиев Ала-Тоо аянтында өткөн майрамдык иш-чарада диджейлик кылган жаш катышуучу менен жолугушту.
Жолугушуу 2026-жылдын 1-июнунда болгон окуяга байланыштуу өтүп, анда майрамдык иш-чара учурунда орун алган кырдаал талкууланды.
Белгилүү болгондой, жаш кыз ШКУнун Дельфий оюндарында коло медаль алган жана ыктыярчылык иштерге активдүү катышып келет. Мэр анын чыгармачылыгын колдоп, келечектеги ишмердүүлүгүнө ийгилик каалады.
Айбек Джунушалиев иш-чара учурундагы каталар үчүн жоопкерчилик уюштуруучуларга таандык экенин белгилеп, тиешелүү кызматкерлер процессти толук көзөмөлдөй албай калганын айтты. Ошондой эле ал жаш катышуучунун күнөөсү жок экенин өзгөчө белгилеп, анын жетишкендиктерине ишеним билдирди.
Жолугушуунун соңунда мэр жаш диджейге символикалык белек тапшырып, шаардык маданий иш-чараларга активдүү катышуусун улантууга чакырды.
Өз кезегинде кыздын апасы бул окуя техникалык мүчүлүштүктүн натыйжасында болгонун айтып, аны келечек үчүн маанилүү тажрыйба катары баалады.
