.
Нарын облустук прокуратурасынын жаңы административдик имараты бүгүн, 31-январда расмий түрдө пайдаланууга берилди. Бул тууралуу Президенттин администрациясы маалымдады.
Ачылыш аземине Министрлер кабинетинин төрагасы Адылбек Касымалиев Нарын облусуна болгон иш сапарынын алкагында катышты.
“2030-жылга чейинки Улуттук өнүктүрүү программасына ылайык Камбар-Ата–1 ГЭСи, Кытай–Кыргызстан–Өзбекстан темир жолу сыяктуу ири долбоорлор ишке ашат. Бүт аймактар өзгөрөт. Дал ушундай масштабдуу өзгөрүүлөрдө кымындай да коррупцияга алдырбоо, калыстыктан тайбоо, ишти иликтөөдө салкын кандуулук жана акыйкаттуулук менен иш алып баруу – мамлекеттин аброюн көтөрүп, элдин бийликке болгон ишенимин бекемдейт. Бул багытта прокуратура президенттин чоң жардамчысы болууга тийиш”, – деди Касымалиев.
Ошондой эле ал 2020-жылдагы өлкөнүн абалы менен азыркы шартты салыштырып, алдыдагы беш жылда дагы ири долбоорлор ишке ашарын белгилеп, прокуратура органдарынын ак ниет жана жоопкерчиликтүү иш алып баруусунун маанисине токтолду.
Маалыматка ылайык, Нарын облустук прокуратурасынын жаңы имаратын курууга республикалык бюджеттен 85,5 миллион сом бөлүнгөн. Ал эми Нарын облусун өнүктүрүүгө жалпысынан 9,4 миллиард сом каражат каралган.
