.
Талас облусунда КР Президентинин ыйгарым укуктуу өкүлү Эрмат Джумаевдин биринчи орун басары Максат Байджигитов Талас шаарында курулуп жаткан “Баластан” оюн-зоок борборунун курулуш иштерин жеринен көрүп чыкты.
Борбор Шамбетов көчөсү №70 дарегинде жайгашып, жалпы аянты 17 000 чарчы метрди түзөт. Анын алкагында иновациялык музейлер, лабиринттер, боулинг, кинотеатрлар жана балдардын интеллектуалдык, чыгармачылык өнүгүүсүнө багытталган борборлор ачылат.
Долбоордун өзгөчөлүгү — жасалма интеллект менен жабдылган 5–6 роботтун орнотулушу. Алар келечекте кыргыз тилинде гид катары кызмат көрсөтөт. Учурда роботтор үчүн Кытай тарап менен сүйлөшүүлөр жүргүзүлүүдө.
Курулуш иштерине 115 адам тартылып, аларды Кыргыз Республикасынын Курулуш министрлигине караштуу “Кыргызкурулуш” мамлекеттик ишканасы аткарууда. Максат Байджигитовдун айтымында, Талас облусундагы бардык ири курулуш объектилери өлкөнүн Эгемендүүлүк күнүнө карата толук бүткөрүлөт. Белгилей кетсек, 2026-жылы Эгемендүүлүк күнү Талас облусунда республикалык деңгээлде белгиленет.
