.
Кыргыз Республикасынын Эмгек, социалдык камсыздоо жана миграция министринин орун басары Айнура Орозбаева майыптыгы бар адамдар үчүн Беловодскийдеги балдар үчүн социалдык стационардык мекемесине жана Сокулуктагы реабилитациялык борборуна атайын медициналык жабдууларды тапшыруу аземине катышты
2026-жылдын 26-январында министрлик менен «Good Neighbors International» эл аралык уюмунун Кыргыз Республикасындагы филиалынын ортосунда түзүлгөн Өз ара кызматташуу жөнүндө меморандумдун алкагында болуп өттү.
Жабдууларды тапшыруу аземине «Good Neighbors International» уюмунун Кыргыз Республикасындагы директору Чо Сунхёнг катышты.
«Бул майыптыгы балдардын жашоо сапатына, алардын ден соолугуна, өнүгүүсүнө жана келечегине багытталган чыныгы инвестиция. Бүгүн тапшырылып жаткан жабдуулар адистердин мүмкүнчүлүктөрүн кыйла кеңейтип, реабилитациялык кызматтардын жеткиликтүүлүгүн жана сапатын жогорулатат, эң негизгиси — балдарга жана алардын үй-бүлөлөрүнө реалдуу пайда алып келет», — деп белгиледи министрдин орун басары.
Өз кезегинде «Good Neighbors International» уюмунун директору бул колдоо уюмдун майыптыгы бар адамдардын укуктарын илгерилетүүгө, социалдык биримдикти чыңдоого жана инклюзивдүү коомду өнүктүрүүгө болгон берилгендигин дагы бир жолу тастыктай турганын белгиледи.
Тапшырылган жабдуулар балдарга жана майыптыгы бар адамдарга көрсөтүлүүчү реабилитациялык жана медициналык кызматтардын сапатын жогорулатууга, ошондой эле алардын калыбына келүүсү, өнүгүүсү жана социалдык адаптациясы үчүн ыңгайлуу жана коопсуз шарттарды түзүүгө багытталган.
Мындай өнөктөштүк гуманизм, тилектештик жана калктын эң аярлуу катмарларына кам көрүү сыяктуу жалпы баалуулуктарга негизделген натыйжалуу эл аралык кызматташтыктын үлгүсү болуп саналат.
