Өспүрүмдөрдү мазактап, зомбулук көрсөткөн видеолор боюнча шектүү жаран кармалды
Өспүрүмдөрдү мазактап, зомбулук көрсөткөн видеолор боюнча шектүү жаран кармалды. Ал Бишкек шаардык милициясынын убактылуу кармоочу жайына киргизилди. Бул тууралуу 6-январда Свердлов райондук ички иштер башкармалыгы маалымдады.
Маалыматка ылайык, кармалган адам 32 жаштагы жаран болуп, анын өздүгү Ф.Р. деп аныкталган.
Бул факты боюнча райондук милиция Кыргыз Республикасынын Кылмыш-жаза кодексинин 280-беренеси («Бейбаштык») менен кылмыш ишин козгоду. Шектүү мыйзамда белгиленген тартипте убактылуу кармоочу жайга камакка алынды.
Милиция билдиргендей, социалдык тармактарда белгисиз эркек адам бир нече адамга карата физикалык жана моралдык зомбулук көрсөткөн видеолор тараган. Иликтөөнүн жүрүшүндө шектүүнүн ким экени такталып, 1993-жылы туулган Ф.В. аттуу жаран Свердлов райондук милициясынын Тергөө кызматына жеткирилди.
Ал Кыргыз Республикасынын Кылмыш-жаза процесстик кодексинин 96-беренесине ылайык Бишкек шаардык ички иштер башкы башкармалыгынын убактылуу кармоочу жайына киргизилди. Учурда тергөө иштери уланууда.
