Шанхай кызматташтык уюмуна мүчө мамлекеттердин айыл чарба министрлеринин жыйынынын алкагында Кыргыз Республикасынын Министрлер Кабинетинин Төрагасынын орун басары – айыл чарба министри Эрлист Акунбеков Кытай Эл Республикасынын айыл чарба министринин орун басары Чжан Чжили менен жолукту.
Жолугушууда эки өлкөнүн айыл чарба тармагындагы кызматташтыгы жана экспорттук мүмкүнчүлүктөр талкууланды. Учурда Кыргызстан 17 протоколго кол койгон, дагы 3 документ макулдашуу стадиясында, ал эми 32 багыт боюнча келишим долбоорлору даярдалууда.
Кыргыз тарап кызматташууну кеңейтүүгө даяр экенин билдирип, Кытайдын Башкы бажы башкармалыгы менен да тыгыз иш алып барууга кызыкдар экенин белгиледи.
