.
Кыргыз Республикасынын Эмгек, социалдык камсыздоо жана миграция министрлигинин мамлекеттик социалдык заказынын алкагында үй-бүлөлүк зомбулукка жана адам сатуунун курмандыктарына кабылган аялдарга жана кыз-келиндерге жардам көрсөтүүгө багытталган жаңы социалдык долбоор ишке кирди.
Министрликтин маалыматына ылайык, 5200 күнү-түнү иштеген ыкчам линия өз ишин баштады. Ыкчам линия үй-бүлөлүк зомбулуктун жана адам сатуу фактыларынын курмандыктарына ыкчам жана сапаттуу жардам көрсөтүүгө багытталган.
5200 номерине чалуу аркылуу ар бир жаран акысыз, анонимдүү жана купуя жардам ала алат. Линияда зомбулукка байланышкан маселелер, кризистик кырдаалдар жана психологиялык колдоо боюнча атайын даярдыктан өткөн кесипкөй психологдор жана консультанттар иштешет.
Ыкчам линия суткасына 24 саат, жуманын 7 күнү, Кыргыз Республикасынын аймагында бардык мобилдик операторлор аркылуу жеткиликтүү.
Ыкчам линиянын негизги багыттары:
• зомбулуктун жана эксплуатациянын курмандыктарына психологиялык колдоо көрсөтүү;
• жабыркагандардын укуктарын коргоо жана жеткиликтүү кызматтар тууралуу маалымат берүү;
• коопсуз жайга, медициналык жана юридикалык жардамга кайрылуу жолдору боюнча кеңеш берүү;
• зомбулукка күбө болгон адамдарга жана жабыркагандардын жакындарына колдоо көрсөтүү.
Ар бир чалуу маанилүү.
Эгерде сиз зомбулукка туш болсоңуз же мындай учурларга күбө болсоңуз — 5200 номерине чалыңыз.
