.
Электр шаймандарын пайдаланууда коопсуздуктун жөнөкөй талаптары сакталбай, өрт кырсыктарынын саны көбөйүүдө. Бул тууралуу ӨКМдин Өрт өчүрүү жана алдын алуу башкармалыгынын башчысынын орун басары Сталбек Абдылда уулу «Биринчи радионун» түз эфиринде маалымдады.
Анын айтымында, өрттөрдүн негизги себептеринин бири — электр зымдарына өз убагында техникалык кароо жүргүзүлбөгөнү. Мындан тышкары, отко этиятсыз мамиле кылуу жана балдардын шоктугу да өрт кырсыктарына алып келүүдө.
ӨКМ өкүлү белгилегендей, электр чубалгылары жана туташтыргычтар коргоо автоматтары менен жабдылышы керек. Бирок аларды өз учурунда алмаштырбоо же туура эмес туташтыруу өрт чыгуу коркунучун жаратат. Айрым учурларда бир эле электр розеткага көп сандагы шаймандар кошулуп, жүктөм көбөйүп, өрттүн чыгышына себеп болууда.
Ошондой эле жаңы курулуп бүткөн көп кабаттуу үйлөрдө газ берилбегендиктен электр плиталарын колдонуп, аларды кароосуз калтыруу да кооптуу жагдайларды жаратып жатканын кошумчалады.
