Бишкек шаарындагы батирлердин биринен ок жаракаты бар эркек кишинин сөөгү табылды
Бишкек шаарындагы батирлердин биринен ок жаракаты бар эркек кишинин сөөгү табылды. Алдын ала маалыматтар боюнча, маркум өз жанын өзү кыйган. Бул тууралуу Свердлов райондук ички иштер башкармалыгынын басма сөз кызматы билдирди.
Маалыматка ылайык, 7-январь күнү болжол менен саат 11:00 чамасында милицияга үйдөн ок жаракаты менен адамдын сөөгү табылганы тууралуу кабар түшкөн. Чалган адам өзүн үй кызматчысы катары тааныштырган. Анын айтымында, жумушка келгенде ашканадан үй ээси — 1967-жылы туулган З.Х. аттуу жаранды көргөн. Маркумдун денесинин астында тапанча жаткан.
Окуя болгон жерге ыкчам-тергөө тобу барган. Кароо жүргүзүүнүн жыйынтыгында күрөштүн белгилери байкалган эмес, үйдүн ичи иреттүү болгон жана маркумдун денесинен башка жаракаттар табылган эмес.
Алдын ала тыянакка ылайык, эркек киши суицидге барган.
Учурда сотко чейинки текшерүүнүн алкагында тиешелүү экспертизалар дайындалып, окуянын бардык жагдайлары такталууда.
