“Кыргыз Республикасындагы лицензиялык-уруксат берүү тутуму жөнүндө”, “Нотариат жөнүндө” мыйзамдарына өзгөртүүлөр киргизилди
Кыргыз Республикасынын Президенти Садыр Жапаров “Кыргыз Республикасынын айрым мыйзам актыларына (“Кыргыз Республикасындагы лицензиялык-уруксат берүү тутуму жөнүндө”, “Нотариат жөнүндө” Кыргыз Республикасынын мыйзамдарына) өзгөртүүлөрдү киргизүү жөнүндө” Кыргыз Республикасынын Мыйзамына кол койду.
Мыйзам 2024-жылдын 30-майында Кыргыз Республикасынын Жогорку Кеңеши тарабынан кабыл алынган.
Мыйзам Кыргыз Республикасындагы нотариат иш чөйрөсүндөгү ченемдик укуктук актыларды өркүндөтүү максатында кабыл алынган.
Мыйзамдын 1-беренесине ылайык “Кыргыз Республикасындагы лицензиялык-уруксат берүү тутуму жөнүндө” Кыргыз Республикасынын Мыйзамынын 9-беренесинин 2-пунктунун “б” пунктчасы жаңы редакцияда баяндалган, ага ылайык колдонулушу Кыргыз Республикасынын белгилүү бир аймагы менен чектелген жеке нотариалдык ишти жүзөгө ашыруу лицензиялары дагы берилиши мүмкүн.
Мыйзамдын 2-беренесине ылайык “Нотариат жөнүндө” Кыргыз Республикасынын Мыйзамынын 14-беренесинин 1-бөлүгүнө толуктоо киргизүү каралган, ага ылайык аймактык колдонуу чөйрөсү боюнча лицензиялар төмөнкүдөй айырмаланат:
– Кыргыз Республикасынын бүткүл аймагында жеке нотариалдык иш жүргүзүүгө универсалдуу лицензия;
– Кыргыз Республикасынын белгилүү бир аймагында жеке нотариалдык иш жүргүзүүгө локалдаштырылган лицензия.
