Президент Садыр Жапаров: Мамлекетибиз бардык аймактары менен бирдикте өнүккөндө гана жаркын келечекке жол алат

“Мамлекетибиз бардык аймактары менен бирдикте өнүккөндө гана жаркын келечекке жол алат. Ушу тапта республиканын жети дубанын тегиз өнүктүрүүгө өзгөчө көңүл бурулууда”, — деп белгиледи Кыргыз Республикасынын Президенти Садыр Жапаров бүгүн, 30-августта, Жалал-Абад шаарындагы Мамлекеттик ипотекалык компания тарабынан курулган “Асман Резиденс-2” турак жай комплексинин ачылышында.

Мамлекет башчысынын сөзү:

“Урматтуу мекендештер!Урматтуу Жалал-Абад шаарынын тургундары!

Өлкөбүздү өнүктүрүүнү аймактардан баштоо биздин мамлекеттик саясаттын негизги өзөгү. Анткени мамлекетибиз бардык аймактары менен бирдикте өнүккөндө гана жаркын келечекке жол алат. Ушу тапта республиканын жети дубанын тегиз өнүктүрүүгө өзгөчө көңүл бурулууда. Өзүңүздөр байкагандай, инвестиция тартуу, инфратүзүмдү жакшыртуу, социалдык объекттерди оңдоп-түзөө жана турак жай салуу жети дубанда тең кызуу жүрүп жатат.

Айрыкча, аймактарды өнүктүрүүдөгү эң натыйжалуу жана таасирдүү багыттардын бири катары жергиликтүү тургундарга жеткиликтүү турак жай куруу маселеси көңүлүбүздүн борборунда.

Бүгүн биз дал ушул маселе боюнча Жалал-Абадда жакшынакай саамалыктын күбөсү болуп олтурабыз. Баарыңыздарды, бөтөнчө, үйлүү болуп, маңдайы жарыла кубанып турган мекендештерибизди Кыргыз Республикасынын эгемендүүлүгүнүн 34 жылдыгынын урматына Жалал-Абад шаарында пайдаланууга берилип жаткан жаңы турак жай комлекстеринин ачылышы менен чын дилимден куттуктаймын!

Ак өргөөңүздөр ак жолтой болсун! Ушул куттуу жай сиздерге өнүгүүнүн башаты болуп берсин!Урматтуу агайын-туугандар!

Чындыгында кыргыз элинин турмушунда үйлүү болуу – эң чоң жакшылыктардын бири. Ак өргөөлүү болуп жаткан жарандарыбыздын мындай сүйүнүчү Кыргыз Республикасынын эгемендигинин 34 жылдыгы менен дал келип жатканы өзгөчө эстен кеткис учур болуп калат. Ал эми мамлекет үчүн өнүгүү жолунда дагы бир жетишкендикти жар салган, жасалган иштеринин үзүрүн тастыктаган кубанычтуу күн!

Биз бүгүн Жалал-Абад шаарында эки жаңы көп батирлүү турак жай комплексин пайдаланууга берип жатабыз. Буга чейин турак жай программасынын алкагында эң алгачкылардан болуп Жалал-Абад шаарында “Асман Резиденс – 1” турак жай комплекси жана Сузак районунда “Асман Резиденс – 5” комплекси пайдаланууга берилген.

2023-жылдан тарта мамлекет турак жай программасынын стратегиясын өзгөртүп, жеткиликтүү үй курууга артыкчылык берип, бул тармакка олуттуу көңүл бурула баштаганын эске сала кетейин.

Ал эми өлкөбүз эгемендик алгандан бери мындай масштабдагы социалдык курулуш биринчи жолу ишке ашырылып жатат. Мунун баары – жамы журтубуз үчүн, жалпы мамлекет үчүн чоң жетишкендик!

Учурда “Менин үйүм” мамлекеттик турак жай программасынын алкагында жалпы республика боюнча 70 миңден ашуун, анын ичинде Жалал-Абад облусунда 13 миңден ашуун батир курулууда. Өлкөбүздүн тарыхында ири масштабдагы социалдык курулуш экени талашсыз.

Аталган программа аркылуу биз жарандарыбызды үй-жай менен камсыз кылуудан сырткары, бир нече максаттарды ишке ашырып жатабыз. Алардын ичинде мамлекеттин курулуш тармагын өнүктүрүү жана инвестиция тартуу жолго салынды. Жер-жерлерде жаңы жумуш орундары түзүлүүдө. Аймактарыбыздын инфратүзүмдүк өнүгүүсү ыкчамдады. Жаш муундардын өз жеринде калып, иштөөсүнө шарттар түзүлдү.

Мындай алгылыктуу иштердин аркасында Мамлекеттик ипотекалык компания тургандыгын жакшы билесиздер. Компания мамлекеттин колдоосуна таянуу аркылуу жеке инвесторлор менен кызматташып, өлкөбүздүн бардык булуң-бурчунда үйлөрдү куруп жатат. Албетте, мамлекет салып жатат.

Урматтуу мекендештер!

Биздин эң негизги байлыгыбыз – бул биздин элибиз, элибиздин ишеними! Мамлекет бул ишенимди актоо аракетин көрүп келет. Буга бүгүнкүдөй саамалыктарыбыз күбө.

Ошондуктан, биз дайыма жаңы курулган үйлөрдү мамлекет менен элдин ортосундагы ишенимдин белгиси, коомдун туруктуулугунун пайдубалы, жамы журтубуздун жашоо сапатын жогорулатууга негиз деп айтып келебиз.

Жаңы үйлөрдө ырыс-кешик мол болсун! Элибизге бакубат турмуш орносун!Эгемен өлкөбүздүн байрагы бийик желбирей берсин!”