Улуттук коопсуздук мамлекеттик комитетинин кызматкерлеринин талабына баш ийбей ок чыгарып, каршылык көрсөткөн “кримтөбөл” Камчы Көлбаев Бишкектеги Blonder pub эс алуу жайында жок кылынган. Бул окуя коомчулуктун көңүл борборунда болуп, социалдык түйүндөрдө кайчы пикирлерди жаратып, талаш-тартыштардын чордонунда талкууланууда. Элдин пикирин окуп отурсаң, дагы деле кылмыш дүйнөсүндөгү адамдарды туу тутуп, “Көлбаевди жамандап, каракчы көргөзүүгө аракет […]
Улуттук коопсуздук мамлекеттик комитетинин кызматкерлеринин талабына баш ийбей ок чыгарып, каршылык көрсөткөн “кримтөбөл” Камчы Көлбаев Бишкектеги Blonder pub эс алуу жайында жок кылынган. Бул окуя коомчулуктун көңүл борборунда болуп, социалдык түйүндөрдө кайчы пикирлерди жаратып, талаш-тартыштардын чордонунда талкууланууда.
Элдин пикирин окуп отурсаң, дагы деле кылмыш дүйнөсүндөгү адамдарды туу тутуп, “Көлбаевди жамандап, каракчы көргөзүүгө аракет кылбагыла”, “Ал кыргыздын чыныгы баатыры болчу”, деген айрым караңгы адамдар да четтен чыкты. Өлгөндүн артынан жамандабаш керек, бирок эмне үчүн аны баатыр тутуп жатышканына түшүнбөгөндөр көп болсо керек. Албетте түшүнүшпөйт. Бирөөнүн байлыгын тартып алганы үчүн баатырбы же өлкөдө бангизаттын көбөйүп кеткендигине салып кошкондугу үчүнбү? Эмнеси үчүн аны баатыр тутуп жатышат? Кылмыштуу топ тескерисинче өлкөнүн экономикасын артка тартып, экономиканы өнүктүрүүгө салым кошуп жаткан ишкерлерди коркутуп акча талап кылып келишкендиги үчүн баатыр болуш керекпи?
Бирок бары бир биздин коом ак менен караны айырмалай баштаганын байкасак болот. Себеби көбүн эсе адамдар УКМКнын кылган ишине ыраазы болушуп, кылмыштуулук азайганын жазышууда.
Албетте жакшы иш алып барып жатат деп жазышат. Себеби ушунча байлыкты топтоп, ушунча авторитетке ээ болгон адамды, анын кылмыштуу чөйрөсүн жок кылуу- бул ар бир эле адамдын колунан келе бербесе керек. Өлкөдө канча бийлик алмашып, канча окуялар болсо да, мындай ири кылмышка чек коюуга аракет кылуу, олуттуу иштерди аткаруу буга чейин болбосо керек. Болсо да мынчалык деңгээлде эмес.
КРнын УКМКнын башчысы Камчыбек Кыдыршаевичтин алгачкы иш күнүнөн тарта алдыга койгон эң биринчи максаты бул-коррупция менен күрөшүү жана өлкөнү кылмышкерлерден тазалоо болгон.
«Мамлекетибиздин кайсы жеринде уюшкан кылмыштуу топтун уюгунун өзөгү болсо, демек ошол жерде УКМКнын кызматкерлеринин ишинин начардыгынан кабар берет. Мамлекеттин бардык булуң-бурчунда уюшкан кылмыштуу топтор болбош керек. Мындай түшүнүктү жоюшубуз керек. Туура, эл болгондон кийин ар кандай кылмыштуулук катталып турат. Бирок биз уюшкан кылмыштуу топторго чабуул жасашыбыз керек»—деген Ташиев.
Мына ошол күндөн тарта өлкөдө күн сайын пара алып жаткандар кармалып, уюшкан кылмыштуу топтун башчылары, мүчөлөрү кармалып, мыйзам чегинде жооп берип келүүдө.
Алсак, Камчы Көлбаевдин уюшкан кылмыштуу тобунун мүчөсү «Алтуха» каймана аты бар Алтынбек Ибраимов 2023-жылдын май айында кармалган. Тергөөнүн версиясы боюнча, кармалгандар көп жылдар бою ишкерлердин жана Кыргыз Республикасынын башка жарандарынын Кытайдан ташыган товарларын алып, Кыргызстанга жана КМШнын башка өлкөлөрүнө сатып келишкен. Ибраимовдун камак мөөнөтү 3-сентябрда узартылган. Ушул жылдын 4-октябрында Алтынбек Ибраимов келтирилген зыяндын ордун толтургандыктан үй камагына бошотулган.
Мындан тышкары бир катар кылмыштуу топтун мүчөлөрү да кылмыш дүйнөсүнөн баш тартып келишүүдө. Алардын акыркыларын тизмектей кетсек:
Камчы Асанбектин уюшкан кылмыштуу тобунун мүчөсү, кылмыш дүйнөсүндө “Точка” деген ат менен белгилүү болгон жергиликтүү кылмыштуу топтун активдүү мүчөсү, ИИМдин маалымат базасында уюшкан кылмыштуу топтун мүчөсү катары турган М.Т.И. кылмыштуу аракеттерден жана көрсөтүлгөн чөйрөдөгү адамдар менен баарлашуудан баш тарткан.
«Сакал» аттуу каймана аты бар кримтөбөл «мыйзамдагы ууру» статусунан баш тарткан.
Камчы Көлбаевдин уюшкан кылмыштуу тобунун «Женго»каймана аты менен таанымал мүчөсү Кадырбек Досонов өзүнүн кылмыштуу жашоосунан баш тартты.
Камчы Көлбаевдин жеке жан сакчысы катары таанымал «Узун Улан» каймана аттуу Улан Барчакеев дагы криминалдык макамдан баш тарткандыгын билдирген.
Камчы Көлбаевдин уюшкан кылмыштуу тобунун мүчөсү Алмаз Эрмекбаев деп тааныштырган адам “уурулардын идеясынан жана криминалдык концепцияларынан” баш тартаарын айткан.
Камчыбек Көлбаевдин кылмыштуу тобунун Нарын облусундагы мүчөсү Нурлан Омокеев бийликти колдоорун айтты.
Ал мыйзам менен жашоого сөз берип, кылмыштуу түшүнүк, ойлордон баш тартаарын айтты.
Жогоруда жазылгандар канчадан бери түптөлүп, эч кимдин алы жетпей келген кылмыш чөйрөсүндөгү адамдардын кайрылуулары. Ал эми бул адамдардан башка дагы канчалаган кылмышкерлер кылмыш чөйрөсүнөн баш тартып жатышканын күндө УКМК берген маалыматтардан билсек болот.
УКМК кылмыштуу топ, коррупция менен гана күрөшпөстөн, Кыргызстандагы туура эмес багытта иш жүргүзгөн ири диний агымдардын да адамдарын кармап, аларды ошол уюмдардан баш тартышына да алгылыктуу иштерди жасап келишүүдө.
Эгерде ушундай темп менен УКМК дагы да иш алып бара берсе өлкөбүздө кылмыштуулук азаят деп ишене берсек болот. Ал эми ишеничибизге буга чейинки жасалган иштер жана УКМК төрагаcы Камчыбек Ташиевдин «уюшкан кылмыштуу топтон ишмердүүлүгүнө бөгөт коюу жана мамлекеттик кызматкерлер арасындагы коррупцияны жоюу боюнча мыйзамдын негизинде тийиштүү чараларды көрөбүз” деген сөзү кепилдик болуп бере алат.
