Бүгүн, 20-июнда Евразия экономикалык комиссиясынын энергетика жана инфраструктура министри Арзыбек Кожошев Экономика жана коммерция министрлиги уюштурган “Транспорт коридорлорун өнүктүрүү, ЕАЭБге мүчө мамлекеттердин соода-транзиттик потенциалын ишке ашыруунун стратегиялык багыты” аттуу тегерек столго катышты.
Арзыбек Кожошев өнүккөн темир жол инфраструктурасынын жоктугунун азыркы шарттарында өлкөдөгү темир жол жана коммуникациялардын туюктугун эске алуу менен Кытай-Кыргызстан-Өзбекстан темир жолун куруу долбоору Кытайдын «Бир алкак» долбоорунун алкагында ишке ашырылып жатканына көңүл бурду. Бир жол демилгеси ата мекендик экономикага башка мамлекеттердин рынокторунан жаңы альтернативалуу жолдорду сунуштайт, ошону менен экономика жүк ташуу жолдорун диверсификациялоо аркылуу транспорттук туюктуктан чыгат. Өз сөзүндө Арзыбек Кожошев өлкөдөгү транспорттук коммуникацияларды өнүктүрүүнүн келечегине токтолду.
“Мүчө мамлекеттердин өкмөт башчылары артыкчылыктуу интеграциялык инфраструктуралык транспорттук долбоорлордун тизмесин бекитишти. Кыргызстандан тизмеге «Луговая – Балыкчы» темир жол участогун электрлештирүү долбоору кирди. Ошондой эле кирүү алдында турган дагы эки долбоор бар, алардын бири Кыргызстан үчүн стратегиялык чоң мааниге ээ «Балыкчы – Кочкор – Кара-Кече – Макмал – Жалал-Абад» темир жолу», — деди ал.
Ошондой эле Кожошевдин айтымында, темир жол курулуш долбоорлорун алдыга жылдыруу Кыргызстан үчүн стратегиялык жактан такталган жана маанилүү кадам болуп саналат. Өлкөнү жарым-жартылай транспорттук изоляциядан чыгарууга багытталган инфраструктуралык долбоорлорду колдоо артыкчылыктуу болуп эсептелет жана азыркы шарттарды эске алуу менен, өлкөнүн региондорун темир жол аркылуу бириктирүү маанилүү. Бул анын экономикасын өнүктүрүүгө, ишкердик жигердүүлүктү жана өлкөнүн ичиндеги сооданы жогорулатууга кошумча стимул болот.
