.
Суу ресурстары, айыл чарба жана кайра иштетүү өнөр жай министрлигине караштуу Кайра иштетүү жана органикалык айыл чарба департаменти «30+20+10» долбоорунун алкагында жемиш пастиласын өндүрүүчү «Накта Как» жеке ишкерине (ЖИ) иш сапары менен барып, ишкананын иши менен таанышты. Ишкана таза, табигый жана экологиялык жактан коопсуз продукцияны өндүрүүгө багыт алып, жасалма кошулмаларсыз жана консерванттарсыз иш алып барууда. Учурда ишкананын ассортиментинде жемиш пастиласынын 25тен ашык түрү бар. Продукция жергиликтүү чийки заттан даярдалып, туура тамактануу жана табигый азыктарга болгон заманбап талаптарга толук жооп берет. Ошондой эле рынокто туруктуу суроо-талапка ээ. Иш сапардын жүрүшүндө ишкананын өкүлдөрү Суу ресурстары, айыл чарба жана кайра иштетүү өнөр жайы министрлигине «30+20+10» долбоорунун алкагында көрсөтүлүп жаткан колдоо жана көңүл буруу үчүн ыраазычылыгын билдиришти. Мындан тышкары, өндүрүштү кеңейтүү жана чыгарылган продукциянын көлөмүн көбөйтүү максатында Сокулук районунун аймагынан 100 чарчы метрлик өндүрүштүк цех куруу үчүн жер тилкесин бөлүп берүү боюнча өтүнүч айтылды. Бул демилге ишке ашкан учурда жаңы жумуш орундарын түзүүгө жана айыл чарба продукциясын кайра иштетүүдө кошумча нарк жаратууга өбөлгө түзөт. «30+20+10» долбоору кайра иштетүү тармагын өнүктүрүүгө, экологиялык багыттагы өндүрүштөрдү колдоого жана өлкөнүн азык-түлүк коопсуздугун чыңдоого багытталган иштерди ырааттуу улантууда.
