Кыргыз эл артисти Юрий Бобковго колдоо көрсөтүү максатында кайрымдуулук концерт уюштурулат
Кыргыз эл артисти Юрий Бобков учурда ден соолугуна байланыштуу татаал дарыланууга муктаж. Дарыланууга каражат топтоп, жардам берүү максатында артисттин чыгармачылыктагы кесиптештери жана Кыргызстандын эстрада ишмерлер союзу кайрымдуулук концертин уюштурууда. Бул тууралуу анын жубайы Асель Осмонова билдирди.
Маалыматка ылайык, Юрий Бобков оор жаракат алып, ийни жанчылып, денесинин бир нече жери сынган. Буга чейин эки жолу операция жасалып, учурда үй шартында дарыланууда. Дарыгерлер анын абалын туруктуу оор деп баалоодо.
Артисттин кесиптештери жана маданият ишмерлери 8-июнь күнү саат 19:00дө өтө турган “Устатыбызды колдойлу” аталышындагы кайрымдуулук концертине коомчулукту чакырышат. Кыргыз маданиятына, тилине жана эстрада өнөрүнө зор салым кошкон Юрий Бобковдун ден соолугуна кайдыгер карабаган бардык жарандар концертке катышып, колдоо көрсөтө алышат.
Кайрымдуулук концертине билеттер Бишкек шаарындагы Спорт ордосунун кассасында 200 сомдон сатылууда. Концертке Гүлшайыр Садыбакасова, Сыймык Бейшекеев, Алтынай Нарбаева, Гульнара Тойгонбаева, Расул Маматкулов жана башка ырчылар катышат. Иш-чараны алып баруучулар — Салима Балтаева жана Ырыс Жоомартова.
Ошондой эле каалоочулар «Эльсом» аркылуу 0 708 60 68 70 номери менен акчалай жардам көрсөтө алышат.
