Жусуп Баласагын атындагы Кыргыз улуттук университетинде (КУУ) бүгүн жогорку деңгээлде «Ааламдашуу жана санариптик трансформация шарттарында илим жана билим берүүнүн өнүгүшү» аттуу эл аралык илимий конференция болуп өттү. Университеттин 100 жылдык мааракесине карата уюштурулган бул маанилүү иш-чарага дүйнөнүн ар кайсы өлкөлөрүнөн келген илимпоздор, изилдөөчүлөр жана санариптик технологиялар боюнча адистер катышты. Конференциянын ачылышында КУУнун ректору, профессор Д. […]
Жусуп Баласагын атындагы Кыргыз улуттук университетинде (КУУ) бүгүн жогорку деңгээлде «Ааламдашуу жана санариптик трансформация шарттарында илим жана билим берүүнүн өнүгүшү» аттуу эл аралык илимий конференция болуп өттү. Университеттин 100 жылдык мааракесине карата уюштурулган бул маанилүү иш-чарага дүйнөнүн ар кайсы өлкөлөрүнөн келген илимпоздор, изилдөөчүлөр жана санариптик технологиялар боюнча адистер катышты.
Конференциянын ачылышында КУУнун ректору, профессор Д. Чонтоев куттуктоо сөзүн сүйлөп, университеттин кылымдык тарыхына токтолду. Ал КУУнун өлкөнүн илим жана билим берүү тармагындагы зор салымын белгилеп, ааламдашуунун жана санариптештирүүнүн заманбап чакырыктарына жогорку билим берүү системасынын ыңгайлашуусунун маанилүүлүгүнө басым жасады.
«Кыргыз улуттук университети 100 жылдык тарыхында илим менен билимдин борбору болуп келген. Бүгүнкү конференция билим берүү тармагындагы эң актуалдуу маселелерди талкуулоо жана илимий кызматташтыкты чыңдоо үчүн мыкты аянтча болуп берди», — деп билдирди ректор Д. Чонтоев.
Конференциянын жүрүшүндө жасалма интеллекттин билим берүүдөгү ролу, кыргыз тилин санариптештирүү, лингвистика жана маданияттар аралык коммуникация, ошондой эле Кыргызстандын эл аралык билим берүү жана санариптик мейкиндикке интеграциясы сыяктуу беш негизги тема боюнча секциялык жыйындар өттү. Катышуучулар билим берүү процессине жасалма интеллектти киргизүү жана кыргыз тилин санариптик форматка өткөрүү маселелерине өзгөчө көңүл бурушту.
Иш-чаранын соңунда катышуучулар өз ара тажрыйба алмашып, жаңы инновациялык долбоорлор менен таанышып, билим берүү тармагын өнүктүрүүнүн келечектүү стратегияларын талкуулашты. Бул конференция КУУнун илим жана билим берүү жаатындагы лидерлик позициясын ырастап, анын дүйнөлүк билим берүү процессине активдүү катышууга даяр экендигин дагы бир жолу көрсөттү.
