Урматтуу Жусуп Баласагын атындагы Кыргыз улуттук университетинин окутуучулары, кызматкерлери жана студенттери!
Сиздерди Улустун улуу күнү – Нооруз майрамыныздар менен ректораттын жана жеке өзүмдүн атымдан чын дилимден куттуктайм!
Бул майрам – кыштын аякташын, күн менен түндүн теңелишин, жер жарылып, чөп чыккан жаратылыштын ойгонушун жар салып, ар бирибиздин жашоо-турмушубузда, аны менен алтын уябыз болгон университетибизде да жаңыланууну тартуулайт.
Бул күнү кыргыздар үй ичин жана короо жайын тазалап, арча күйгүзүп, түтүн чыгарып аласташкан, таарынышкан адамдар бири-бирин кечирүү менен жарашышкан, ар бир үйдө Нооруз дасторкону жайылып, ага түрдүү даам коюлган. Кыргыздар бул күнү өндүрүлгөн арпа, буудай же жүгөрүдөн көжө (сүмөлөк) жасашкан, анткени ал табияттын өлбөстүгүнүн, жашоо-турмуштун гүлдөп өнүгүшүнүн белгиси катары бааланган. Майрам күнү бири-бирине жакшы каалоолор айтылып, сый белектер тартууланат. Биздин университетте дагы ушундай маанай орноп, жакшы каалоо тилектер айтылып, жакшылык үмүттөр ичи-койнубузга толот деп ишенем!
Урматтуу кесиптештер!
Жаз майрамы менен кошо жүрөгүңүздөргө да жаз келип, жан дүйнөңүздөрдө, өлкөдө, үйүңүздөрдө жана университетибизде тынчтык, кененчилик, сый-урмат жана бакубатчылык орун алсын! Бул жылы өзгөчө статус алган окуу жайыбыздын алдына коюлган чоң план, максаттарды ишке ашыруу үчүн, зоболосун мындан да жогору көтөрүү, аброюн бекемдөө үчүн ак дилиңиздерден аракет кылышыңыздарды каалайм жана терең ишенем!
Университеттин жаркын келечеги – биздин келечек! Биздин жакшы келечегибиз – университеттин келечеги!
Университеттин жалпы эмгек жамаатын жакшы тилектерге бай Нооруз майрамы менен дагы бир жолу чын жүрөктөн куттуктайм. Баарыңыздарга аманчылык, үй-бүлөдөгү бейпилдикти, чыӊ ден-соолук, бакты-таалай, окуудагы жана жумуштагы зор жетишкендиктерди, кайратман эмгекти жана чыгармачылык ийгиликтерди каалайм!
Сиздерди тереӊ урматтоо менен,
Жусуп Баласагын атындагы Кыргыз улуттук университетинин ректору, профессор Т.Абдырахманов