/Сокол Медиа/ — 2023-жылдын 27-январында Кадамжай районунун тургуну 1984-жылы туулган А.Б. арыз менен кайрылып, анда жарандык никеде жашап жүргөн аялы Кадамжай районунун Марказ айыл аймагынын тургуну Ш.М. 2021-жылы туулган А.Х. аттуу кызын уруп, зомбулук көргөзүп келгендигин билдирип, мыйзам чегинде чара көрүүнү суранган.
Аталган маалымат Кадамжай РИИБдин Маалыматтардын электрондук журналына катталып, тергөөгө чейинки текшерүү иштеринин жүрүшүндө төмөнкүлөр аныкталган.
2020-жылдын март айында Кадамжай районунун тургуну 1984-жылы туулган А.Б. Кадамжай районунун Марказ айыл аймагынын тургуну Ш.М. менен жарандык никеде жашап жүрүп, 2021-жылдын 13-мартында А.Х. аттуу кыздуу болушкандыгы, 2023-жылдын январь айынын баш чендеринде экөө өз ара келише албай, ортолорундагы келишпестиктен улам арыздануучу менен аялы эки ажырым жолго түшүшкөн. Ошол себептүү, Ш.М. 2023-жылдын 5-январында өзүнүн кызы А.Хны уруп, уюлдук телефонуна тартып, жолдошуна WhatsApp аркылуу жибергендиги аныкталган.
Аталган факты боюнча жаш бала А.Хга карата соттук-медициналык жана соттук-психолого-психиатриялык экспертизалар дайындалып, Ш.Мнын уюлдук телефондору далил буюм катары алынган.
Ал эми жогорудагы факты боюнча КР Кылмыш-жаза кодексинин 138-беренесинин 2-бөлүмүнүн 2-пункту (баланы же алсыз абалдагы же күнөөлүүдөн материалдык же башкадан көз каранды болгон адамды уруп сабоо) боюнча кылмыш иши козголгон.
Азыркы учурда сотко чейинки өндүрүш иши боюнча тергөө амалдары жүрүп жатат.