13 кыз болгон. Бишкекте чет өлкөлүк жарандар жашыруун оюн-зоок жайын уюштурушкан

ИИМдин ыкчам кызматы Бишкек шаарында чет өлкөлүк жарандар тарабынан уюштурулган көмүскө оюн-зоок жайын тапкан. Аныкталган маалыматтар боюнча көмүскө оюн-зоок жайы чектелген адамдар үчүн гана иштеп келген. Бул көмүскө жай сырттагыларга “караоке” катары көрүнүп келген.
ИИМдин Басма сөз кызматы маалымдагандай, кылмыш-жаза кодексинин 219-1-беренеси (Оюн-зоок ишин мыйзамсыз уюштуруу) боюнча козголгон кылмыш ишинин алкагында тергөө-ыкчам иш-чаралар өткөрүлдү.
Бул жайга ИИМдин Кылмыш иликтөө башкы башкармалыгынын ыкчам кызматкерлери кирген учурда Азия өлкөлөрүнүн биринин 20дан ашык жараны көңүл ачып жүрүшкөн. Ошондой эле 13 кыз болгон, алардын бири жашы жете элек болуп чыкты. Имараттын ичинде оюн столдору табылган. Мындан сырткары, акча каражаттары, фишкалар алынган.
Бардык чет өлкөлүк жарандар, анын ичинде ал жакта жүргөн кыздар Свердлов райондук ИИБге жеткирилди.
Көмүскө оюн-зоок жайынын ээси- чет өлкөлүк жаран 1984-жылы туулган Ч.Х. жана Бишкек шаарынын тургуну 1983-жылы туулган М. А. кармалып, убактылуу кармоочу жайга киргизилишти.
Учурда тергөө иштери жүрүп жатат.