Бактыгулов: шайлоо — кандайдыр бир деңгээлде саясий люстрация

Саясат таануучу Шерадил Бактыгулов келе жаткан шайлоо жаңы эрежелер менен өтүп, жыйынтыгын божомолдоо мүмкүн эместигин белгиледи.
Бул жолку шайлоо кандайдыр бир деңгээлде саясий люстрация. Ошондуктан жоопкерчилик менен добуш берүү зарыл. Мындай пикирин Шерадил Бактыгулов Sputnik Кыргызстан радиосунда маек куруп жатып билдирди.

Анын айтымында, азыркы шайлоо системасы менен мурдагыдай «менчик» округдар болбойт.
«Келе жаткан шайлоону буга чейинкилер менен салыштырып болбойт. Мурда бир мандаттуу округдарда 20-25 миң шайлоочу болчу. Учурда мыйзамда бир округ 100 миң шайлоочу деп көрсөтүлдү. Демек, бир мандаттуу округдан чыгуу мурдагыга салыштырмалуу татаал. Бул жагынан алганда аялдар, жаштар жана башка экенине карабай шайлоочулардын арасында бедели болсо өтөт. Мурда округдар чакан болуп, ал аймактагы таасирдүү же бай адамдардын «менчиги» сыяктуу болчу. Аялын, тууганын өткөрүп же өзү деле катышып жеңип алчу. Ал эми азыр кыйла татаал. Маселен, Талас облусунда эки округ бар, бирок күчтүү талапкерлер көп. Алардын кимиси мандат алып келет, божомолдоо мүмкүн эмес. Ошол эле саясий коррупцияны дагы жоюуга мүмкүн болот. Анткени мурда ким мандат аларын партиянын лидери чечсе, азыр добуштардын негизинде лидери өзү өтпөй калуу коркунучу бар. Бул жагынан алганда келе жаткан шайлоо кайсы бир деңгээлде саясий люстрация. Ошондуктан шайлоочулар добушун жоопкерчиликтүү бериши керек», — деди Бактыгулов.
Ошондой эле ал бир мандаттуу округдагы шайлоочулардын көбөйүшү добуш сатып алууну жокко чыгарарын кошумчалады.
Эске салсак, быйыл 28-ноябрда Жогорку кеңештин VII чакырылышына шайлоо өтөт. Ага ылайык 29-октябрда 30 күндүк үгүт иштери башталган.

Читайте также:

Добавить комментарий

Ваш адрес email не будет опубликован.